Obradoiro para nen@s. Arquitectura para nen@s

O xoves 4 de xullo falamos de Arquitectura dirixido polo arquitecto e profesor desta escola Xerardo Pérez Medrano. Iniciamos o obradoiro facendo unha reflexión sobre o cuarto no que vivimos, e intentamos debuxalo. Repasamos distintos métodos de representación (alzados, seccións, perspectivas, plantas,…). Debuxamos a casa en situacións extremas: nunha árbore, sobre o mar, baixo o mar, …

Como iniciación á arquitectura moderna estudiamos a Casa Farnsworth, de Mies van der Rohe, unha casa minimalista no medio dun bosque, sen portas e pechada na totalidade con vidros. Os nen@s estaban fascinados.

Finalmente construimos dita casa con pezas de Lego.

patio de butacas

 

A golpe de mércores 3 de xullo no noso particular Patio de Butacas dirixido pola deseñadora Susana Román pasouse a película “Dentro do Laberinto” de Jim Henson, pai de marionetas e títeres tan famosos na televisión como Los Teleñecos e “La Rana Gustavo”, “La Cerdita Peggy”, os entrañables “Epi y Blas”, e  no cine como o “Mestre Jedis” máis poderoso da galaxia que foi Yoda.

 A intención desta actividade era amosarlles a estes cativos un tipo de cine que non coñecen, acostumados hoxe en día ás animacións dixitais,  e tamén ao mítico David Bowie autor da música  que bailan os persoeiros da historia da que el mesmo é vilán e protagonista.

 Para  rematar o obradoiro seleccionamos os persoeiros, as escenas e os diálogos máis salientables para recrealos nun mural feito entre todos.

Gañadores da 1º Bolsa de Estudos en Deseño

Reunido o xurado do concurso da 1º Bolsa de Estudos en Deseño, convocado por Aula D, e conformado éste por Manuel Barreiro Chao (director do centro), Pedro Román Company (xefe de estudos), Xerardo Pérez Medrano (arquitecto e profesor de Tecnoloxía), Diego Fernández Pérez (deseñador e xefe do dpto. de Gráfica Publicitaria) e Andrea Costas Lago (artista e profesora de Fotografía), acordan conceder unha bolsa de estudos aos seguintes participantes:

– Be Ita (Beatriz Santorun Vázquez)

– Nerea Macabra Elektro Duende (Nerea Paños Boente)

Os primeiros tres finalistas, por número de votos, foron Beatriz Santorun Vázquez (263 votos), Nerea Lorenzo (215 votos), Nerea Paños Boente (211 votos). Os outros tres finalistas seleccionados foron Beatriz Fernández García, Diego Orge Vázquez e Daniel Alonso Pérez.

 

Os catro finalistas que non foron premiados están invitados a asistir ao cursiño monográfico que eles elixan dos que Aula D levará a cabo durante o curso 2013/2014.

Parabéns aos gañadores así como ao resto de participantes.

Laboratorio de experimentación teatral

Neste obradoiro achegámonos ao mundo do teatro a través da creación colectiva. Comezamos con exercicios que nos esperten a capacidade de observación e de escoita, que sinto, onde, como?
Espelimos o corpo cun quecemento de pés e articulacións para probar diferentes xeitos de andar… Agora camiñamos a modiño, de súpeto temos moitísima presa , agora coma un robot, agora coma un pingüín a cámara rápida, agora coma…
Que liñas poderíamos debuxar no espazo para mostrar na escena a torre Eiffel?, as Meninas?, e as pirámides de Exipto?, e…?
Traballamos co corpo, co xesto, coa palabra…e sobre todo coa oportunidade que nos brinda o teatro  para contar cousas.
Cantas historias poderíamos elaborar partindo das verbas dun xornal? Pasamos ao guión: escribimos as escenas, construímos as personaxes, como son?. Qué……..?

Obradoiro de música

 

O martes 2 de xullo e dentro do obradoiro de nen@s deu comezo a fabricación de instrumentos musicais organizado polo deseñador e profesor de aula d Manuel Barreiro Chao. Moito antes de que existira o tren eléctrico; a nintendo ou a wii, @s nen@s enredaban entre outros facendo sinxelos instrumentos musicais, para os que empregaban os materiais que encontraban no seu contorno e outros procedentes da reciclaxe, pólas de abeneiro para facer asubíos , canas para facer frautas e carrizos, etc.
Neste obradoiro de música recollemos esta idea e para comezar fixemos un pao da chuvia partindo dun tubo de cartón, uns garabullos e unha mistura de arroz, lentellas e garavanzos.

 

obradoiro de cartón pedra

E para rematar a primeira semana do obradoiro para nen@s o venres 28 de xuño, recibimos en Aula D a visita de Tutankamón, Batman, Spiderman, Bart Simpson e algún Zombi. Tamén pasaron por alí tribos africanas, reis aztecas e bruxas e bruxos dos bosques centroeuropeos, todos para  axudarnos coas caretas que tiñamos que facer no obradoiro de cartón pedra.

Trala aprendizaxe da técnica e realizar os primeiros ensaios, os pequen@s creadores cortaron e pregaron o cartón base. Logo de diluír en auga a cola de carpinteiro e xuntar unha cantidade suficiente de anaquiños de papeis de cores xorden soles rosas, amárelos e mesmo multicolores, o mesmo Tutankamón e algunha máscara africana.

Obradoiro de camisetas

O mércores 27 de xuño asistiron ao noso obradoiro de verán para nen@s , seis novísim@s creadores dispostos a participar no día de luxarse da cabeza aos pés no “Obradoiro de Camisetas”. dirixido pola deseñadora Susana Román.

Falamos entre outras cousas dos “hippies” e dos tipos de impresión máis actuais e decoramos as nosas camisetas de forma artesán, mediante selos feitos con pataca, recortes, cinta adhesiva e por suposto pinturas acrílicas de cores.

A finalidade desta actividade era divertirse aprendendo, misturar as cores primarias para obter as secundarias mailas súas complementarias e concebir unha idea facendo un bosquexo previo antes de pasar ao soporte definitivo, que no noso caso era a camiseta branca.

¡Este verán poderemos lucir as cracións destes pequen@s deseñadores!

 

Tipografía. Letras ao grande

O martes 26 de xuño, no marco do obradoiro de verán para nen@s achegámonos ao mundo da tipografía. Falamos das letras de pao seco e con remates, e repasamos o mundo dos códices cos amanuenses(escribáns) e os iluminadores (debuxantes).

Divididos en grupos de tres, deseñamos unha letra capital (decorada) para reproducir cun tamaño de 1 x 1 m. A silueta das letras realizouse cunha corda flexible que delimita as zonas que posteriormente foron coloreadas con arroz tinguido.

Este é o traballo destes pequenos tipógrafos.

A CIDADE DE ENCARTAR

 O día 25 de xuño amanecía soleado e caluroso. A praza na que se encontra Aula D estaba preparada para acoller a Cidade ideada pola arquitecta Iria Sobrino Fagilde e o seu equipo de pequenos urbanistas para os que tiña preparada a seguinte actividade.

 “O obxectivo didáctico da actividade é que os nenos comecen a ordear os elementos que forman a cidade, de tal xeito que sexan capaces de observar, non só a súa senon tamén as que visiten.

Creemos unha cidade para xogar a partires dun territorio imaxinario: Aquí hai un río, aquí a praia, unha montaña, o camiño, a biblioteca e o parque… saberiamos imaxinar a cidade ao redor? qué fai falla para completar o puzzle? pensemos, deseñemos no chan e construamos con cartón e papel o que consideremos imprescindible para poder xogar con ela.

Hoxe seremos un pouco sociólogos, un pouco urbanistas, un pouco arquitectos, un pouco constructores e un pouco habitantes e paseantes”.

 

Navegación de entradas

1 2 3 5 6 7 8 9
Volver arriba