Dende o noso nacemento como centro de estudos profesionais fomos pasando por diferentes etapas, medrando e mellorando día a día co fin de continuar ofrecendo un ensino de calidade.
Esta traxectoria de máis de 25 anos como centro de estudos profesionais permítenos ao día de hoxe coñecer e identificar as necesidades formativas no ámbito do deseño así como dispor dos recursos máis axeitados para ofrecer aos nosos alumnos e alumnas unha boa formación que os capacite para acceder inmediatamente ao mercado laboral.
1987
O xérmolo da actual Aula D encontrámolo, máis ou menos, aló polo ano 86 no 6º andar do edificio Curvera/Rañaceos, por iniciativa dun grupo de profesionais. Esta iniciativa vaise transformando nun proxecto, que se concreta coa constitución, en xuño de 1987, da Aula D Diseño, contando daquela cuns 25 alum@s e un cadro de profesores formado por cinco persoas.
1999
É o ano no que, definitivamente, toma corpo o proxecto de Aula D, centro autorizado de artes plásticas e deseño, sendo autorizados pola Consellería de Educación para impartir o Ciclo Formativo de grado superior de Deseño de Interiores e Arquitectura Efémera.
2001
Neste ano dan comezo os estudos de Deseño gráfico (Gráfica publicitaria), para o que foi precisa a incorporación de novo profesorado específico para impartir o ciclo. Comeza así unha nova etapa coa que, a escola amplía significativamente a súa oferta educativa e continúa apostando por un ensino de calidade.
2012
A escola amplía a súa oferta educativa programando unha serie de cursos monográficos dende os que se imparten contidos específicos relacionados con disciplinas como fotografía, deseño 3D, ilustración, tipografía, programación, etc. Igualmente lánzanse dous cursos de duración media: o CIDE, un curso de introducción ao deseño e o 1º Curso de Ilustración e Banda Deseñada.
2018
Nesta nova etapa a escola traslada as súas instalacións á rúa Elduayen, en pleno casco histórico, integrándose de cheo no tecido cultural da cidade, colaborando con outras instituciónse e acollendo periódicamente a profesionais, artistas e colectivos co ánimo de complementar a oferta formativa con outras actividades extraacadémicas complementarias de caracter divulgativo.
