A comunidade educativa de Aula D, conformada polo alumnado, profesorado e equipo directivo, quere expresar públicamente a súa profunda preocupación e dor ante a grave situación humanitaria que se está a vivir en Gaza debido ao xenocidio que o Estado de Israel está levar a cabo sobre a poboación palestina.
Desde a nosa responsabilidade como institución educativa, comprometidos cos valores universais da paz, da xustiza e do respecto á dignidade humana, denunciamos e condenamos con firmeza a violencia exercida contra a poboación civil, que está a provocar un sufrimento inxustificable, especialmente entre as persoas máis vulnerables: nenos, nenas e familias enteiras.
Entendemos que ningunha causa pode xustificar a destrución sistemática de vidas, fogares e dereitos fundamentais. Como comunidade que traballa cada día pola formación integral das novas xeracións, sentimos a obriga ética e moral de erguer a voz fronte á inxustiza e a crueldade á que se está a someter a todo un pobo, que presenciamos con impotencia cada día, e que semella non ter fin.
Reclamamos á comunidade internacional, aos gobernos e ás institucións responsables que actúen con urxencia para deter a escalada da violencia, garantir a protección e coidados á poboación civil e asegurar o respecto ao dereito internacional humanitario.
Unímonos a todas as voces que dentro e fóra das aulas reclaman paz, xustiza e liberdade, reiterando o noso compromiso de educar en valores de convivencia, diálogo, empatía e na defensa inquebrantable dos dereitos humanos, solidarizándonos co pobo palestino e agardando que o clamor da sociedade sirva para deter esta inxustificable barbarie.